Круглаполава Святлана Міхайлаўна (г. Гродна. Мастацкая кераміка)

Круглаполава С.М. (1975 г.н.) – таленавіты майстар мастацкай керамікі з г. Гродна. З 2009 года Святлана Міхайлаўна з’яўляецца ўдзельнікам народнага аматарскага калектыву дэкаратыўна-прыкладнога і выяўленчага мастацтва “Гарадзенскі каларыт” ДУ “Гродзенскі гарадскі цэнтр культуры”.

З 1996 года, і па сённяшні дзень працуе педагогам дадатковай адукацыі і кіраўніком узорнай студыі мастацкай керамікі “Казачная гліна” ДУА “Цэнтр творчасці дзяцей і моладзі “Прамень” г.Гродна”.

Пры стварэнні гліняных цацак Святлана Міхайлаўна імкнецца прытрымлівацца народных традыцый, але выкарыстоўвае для гэтага сучаснае абсталяванне, матэрыялы, а таксама свае аўтарскія задумкі. Для афармлення сваіх вырабаў Святлана Круглополова выкарыстоўвае элементы беларускага народнага дэкаратыўнага роспісу, якім карысталіся нашы продкі пры роспісу драўляных куфраў.

Керамічныя вырабы майстра – птушкі, качкі, конікі, баранчыкі, козлікі, званочкі — вылучаюцца лаканічнасцю і прастатой форм, адказваюць патрабаванням традыцыйнай беларускай цацкі. Яе вырабы выклікаюць захапленне і знаходяцца ў музеях і экспазіцыях г. Гродна.

З 2023 года Святлана Міхайлаўна з’яўляецца членам грамадскага аб’яднання “Беларускі саюз майстроў народнай творчасці”.