21 сакавіка на Дзятлаўшчыне дадзены старт абласному агляду-конкурсу аматарскіх аб’яднанняў “Свет захапленняў”, які праходзіць з ініцыятывы Гродзенскага абласнога метадычнага цэнтра.
Першымі сваімі талентамі і багатай фантазіяй гасцей здзіўлялі наведвальнікі аматарскага аб’яднання “Нам гады не бяда” сектара пазастацыянарнага абслугоўвання насельніцтва Дзятлаўскага раённага цэнтра культуры і народнай творчасці (загадчыца Ганна Харлінская). На суд абласнога журы вынеслі адкрытае пасяджэнне клуба па тэме “Мода на трэці ўзрост”.
Праграма сустрэчы ўключала яркія відэапрэзентацыі аб наведвальніках аб’яднання і іх захапленнях, якія дапамог падрыхтаваць Іван Каско.
Пасля прыемнага відэазнаёмства мадэлі трэцяга ўзросту ўпэўнена выйшлі на подыум і прадэманстравалі прысутным тры модныя дэфіле: у вячэрніх сукенках, у вязаных уборах, у джынсавых абноўках. Кожная з калекцый была па-свойму прывабнай, аднак гледачы асабліва адзначылі апладысментамі джынсавую. Прыгожае дэфіле па чырвонай дарожцы стала вынікам плённага шматдзённага супрацоўніцтва наведвалькнікаў аб’яднання і мастацкага кіраўніка Наталлі Бузук.
Паколькі размова вялася пра моду, не абышлося без майстар-класа па візажы, які прафесійна правяла Марына Шаўчук. Яго ўдзельнікі атрымалі прыемныя падарункі ад аўтара. На хвілінку здароўя мадэляў трэцяга ўзросту запрасіла Алена Майсюк. Яна паказала комплекс практыкаванняў, рэгулярнае выкананне якіх дапаможа трымаць арганізм у тонусе.
Не модай адзінай славяцца прыгажуні, таму наступным этапам сустрэчы стала дэгустацыя кулінарных шэдэўраў наведвальніц аб’яднання і ацэнка кулінарнай выставы. Добры настрой на працягу свята прысутным дарылі ўдзельнікі калектываў аматарскай творчасці.
Напрыканцы мадэлі атрымалі прыемныя падарункі. За падрыхтоўку свята і шматгадовае плённае супрацоўніцтва ім, а таксама спецыялістам аддзялення дзённага знаходжання для пажылых людзей Цэнтра сацыяльнага абслугоўвання насельніцтва Дзятлаўскага раёна Галіне Касцюк і Алене Якаўчык падзякавала загадчыца аддзела метадычнай работы Дзятлаўскага раённага цэнтра культуры і народнай творчасці Марына Лукіянец.
На Дзятлаўшчыне ўдзел у абласным аглядзе-конкурсе “Свет захапленняў” прынялі і правялі адкрытыя пасяджэнні яшчэ два аб’яднанні: клуб пажылых людзей “У коле сяброў” Дварэцкага дома культуры і аматарскае аб’яднанне “Нам гады не бяда” Данілавіцкага дома культуры.
У Данілавіцкім Доме культуры адбылася гульнёва-пазнавальная праграма “Сакрэты бабулінага куфэрка” ў рамках адкрытага пасяджэння аматарскага аб’яднання “Нам года не беда”. Зазірнуўшы ў куфар, юныя удзельнiкi клуба выхаднога дня “Вяселая кампанiя” ўбачылi сапраўдныя багацці, якія вырабілі працавітыя і нястомныя рукі жанчыны для сваёй сям’і. На працягу ўсяго пасяджэння бабулі расказвалі і паказвалі, як з воўны, з ільну стваралася нітка і як потым з iх дапамогай стваралася прыгожае адзенне. Дзеці таксама змаглі паўдзельнічаць і паспрабаваць свае сілы ў гэтай нялёгкай справе.
У Дварэцкім доме культуры адбылася конкурсная праграма “Супербабушка Дворца”, якая пачалася з візіткі “Сямейны альбом”, падчас якой удзельніцы распавялі пра сваю сям’ю па фатаграфіях, пазнаёмілі са сваімі дзецьмі і ўнукамі. У конкурсе “Бабуля-цырульнік” праявілі сваё цырульнае майстэрства. Затым з завязанымі вачыма спрабавалі адгадаць варэнне, разам з гледачамі спявалі песні на зададзенае слова, выдатна выступілі ў творчым конкурсе. Усе ўдзельніцы атрымалі каштоўныя падарункі ад раённай арганізацыі “Беларускі саюз жанчын”. Сустрэча скончылася фотасесіяй і чаяваннем.
