Пуйдак Ганна Іванаўна (аг. Геранёны Іўеўскага раёна. Вышыўка)

Пуйдак Ганна Іванаўна (1951 г.н.) – таленавіты майстар вышыўкі з аг. Геранёны Іўеўскага раёна Гродзенскай вобласці. Асноўным напрамкам творчай дзейнасці Ганны Іванаўны з’яўляецца традыцыйная вышыўка. Майстрыха па-майстэрску валодае рознымі прыёмамі вышыўкі: крыжыкам, гладдзю, процягам, падоўжаным і папярочным наборам. Творча падыходзіць да выкарыстання нацыянальных і рэгіянальных матываў у вышыўцы, умела сумяшчае розныя арнаменты.

Акрамя вышыўкі валодае навыкамі фларыстыкі, роспісу па шкле, лапікавага шыцця, ткацтва, выцінанкі, стварэння тэкстыльнай лялькі.

У сваёй рабоце Ганна Іванаўна абапіраецца на матэрыялы этнаграфічных экспедыцый па Лідскаму і Іўеўскаму раёнах, этназбораў з фондаў аддзела рамёстваў і традыцыйнай культуры ДУК “Іўеўскі цэнтр культуры і вольнага часу”, ДУК “Гродзенскі абласны метадычны цэнтр народнай творчасці”, а таксама на грунтоўныя крыніцы выданняў.